مشراف: وشيش

الى الأديب : أحمد يوسف عقيلة

زاد وشيش عقلي من وشيشه قبل ايشوش توّا ما يشوش

قـاشط صَرع للعين المليشه شين معــاه شْلّت فالنتـوش

جايل حَرَش يطرفّا نشيشه شَـور اجلوه كَي ترمش ارموش

تشقى وين تشقى في نبيشه شَـبره شَـبر جيّاش الجيـوش

هي للحْسن في خفة الريشة تضحك ضحك عيّل باطربوش

هو م الشك ما يشفى فتيشه بيش ايبش للـوجه البشــوش

من ما شاف شبّهله خَويشه كَـش احنوش في وَش الاقشوش

هـي بالنفس تنظر للمعيشه تبّـي رِيّ م البرق الركوش

كَي الربيع في غاية طفيشه زَف الطلع نــوّار الحـروش

فيه اتحمل في لعبه شليشه وزر النَفر من هَتك العشوش

هو ها العيش ما ينجم يعيشه شـايل وَش من شَيل النعوش

عيشه جَبر شايفّا تفيشه جوبه شَحط في مَشفَر اوحوش

جافي شين و افجوجه وحيشه شـوله جرب تشرب ع الطنوش

عيشة غش عيشه ميش عيشه عيشة شفش شالش فـي اشفوش

حَمقه فيـه مقرونه ابطيشه كـانت فَـتح للعـين الرعوش

في جولات تنتـشّن نتيشه منّه قيس قَدحه و اشلموش

بين احلام طابن في لبيشه ساعة صَفو جَوّه م الغبوش

فيـهن هَـزَ لفـواد ابرعيشه هَـزّة لَرض م الغيم الرشوش

قالت ويـن يا النار الطشيشه تطرد بَـرد كامن فـ الدبوش

يا ميعـاد ترسم فيه ريشه عند الدار في هَيف امعروش

فيه البَسط و الحجّه طقيشه فيه الضحك مو ضحك امغشوش

بيــن ايدين كَسّــار الغبيشه كَسـر الشَـط للمـوج اللطـوش

عينه بين تذبيله و طيشه تجرح فـي اصبـيّي بالرموش

هفوة ريش من طير العريشه تلمس صحن خَـدّه بالختــوش

ناض ابشَظّ يبرم ع الدشيشه شَلّ اشوال في عين الجروش

طْرطش كَي اطرطيشة الشيشه قال البَـكش ما هـو للنكوش

و ايش جنيت من برشا شريشه رَشّت رَش و شتّتا نشـوش

جَــر الشوق دهشّني دهيشه شافق لا اهشوش و لا انشـوش

شَـد انتوش لهوشة الهبيشه جابه شَـد الشاري بالقروش

ينهش نين يشبع من نهيشه دون المَـجد جاير لا ينوش

هـذا بيش في جوله بطيشه شـاش الشعب وانشلفن اعروش

جـاك الشَلط شلّي يا جهيشه شـانك شـان شـلاّية الغَـوش

مشراف